Njohim artistët:

Ilir A. Tolaj u lind në Mitrovicë. Ai e filloi karrierën e tij muzikore në grupin Akumulatori si instrumentist i qiftelisë që në moshën 6-vjeçare. Më pas, ai krijoi grupin rock “Krater” dhe u bë gitaristi më i ri i grupit Marigona në vitin 1992. Përveç instrumentit të tij kryesor, gitarës, ai është gjithashtu kompozitor, orkestrues dhe producent muzikor i shumë këngëtarëve në skenën muzikore kosovare dhe atë shqiptare.
Në vitin 2004, së bashku me disa muzikantë të shquar të skenës muzikore, krijoi projektin “Ethnically Plugged,” i cili bëri bujë të madhe në të gjitha trevat shqiptare. Gjatë viteve, Iliri ka punuar edhe si producent televiziv dhe drejtor artistik në shumë televizione të Kosovës, duke kompozuar mbi 300 këngë, muzikë për reklama, dokumentarë etj.

Ilir Tolaj do të mbajë një workshop, ku muzikantët e rinj do të kenë fatin të marrin pjesë dhe të mësojnë mbi programimin, miksimin dhe produksionin muzikor. Ky workshop është një mundësi e jashtëzakonshme për talentet e reja për të marrë njohuri dhe përvoja të vlefshme nga një prej figurave më me përvojë në industrinë muzikore.